Son.az xəbər verir ki, Tramp ilə Putin arasında Macarıstanın paytaxtı Budapeştdə keçirilməsi planlaşdırılan görüşün yaxın zamanda olmayacağı bildirilib.

ABŞ mediası, mənbələrə istinadən yazır ki, ABŞ dövlət katibi Marko Rubio ilə Rusiya xarici işlər naziri Sergey Lavrov arasında dünən baş tutan telefon danışığı zamanı Moskvanın Trampın sülh planına laqeydliyi hiss olunub.

Ağ Ev rəsmisi açıqlamasında deyib: "Dövlət katibi Rubio və nazir Lavrovun telefon danışığı kifayət qədər məhsuldar olub. Buna görə əlavə üzbəüz görüşə ehtiyac yoxdur və Prezident Trampın yaxın gələcəkdə Prezident Putinlə görüşməsi planlaşdırılmır."

Kremlin sözçüsü Dmitri Peskov da məsələ ilə bağlı bildirib ki, "hələ razılaşdırılmamış bir görüşü təxirə salmaq olmaz. Nə Prezident Tramp, nə də Prezident Putin dəqiq tarix verməyib. Bu cür zirvələr ciddi hazırlıq tələb edir və bu, vaxt aparır."

Peskov həmçinin Putin və Trumpın eyni təyyarə ilə Budapeştə uçacağı barədə xəbərləri "fantastik ssenari" adlandırıb.

Zirvənin baş tutmaması ilə bağlı Ukrayna Prezidenti Zelenski də maraqlı açıqlama verib. O, sosial şəbəkədə paylaşdığı videoda deyib: "Cəbhə xətti diplomatiyanı alovlandıra bilər."

Zelenski Ukraynaya Tomahawk raketlərinin verilməsi ilə bağlı Vaşinqtonla aparılan danışıqlara toxunaraq bildirib:

"Ukraynaya uzaqmənzilli hücum imkanlarının verilməsi məsələsində çeviklik azalan kimi, Moskvanın diplomatiyaya marağı da dərhal itdi."

Zelenski əlavə edib ki, Rusiyanın diplomatiyadan yayınmaq üçün hər yola əl atdığını düşünür və bu vəziyyətin "Ukraynanın uzaqmənzilli raket qabiliyyətinin əslində sülhün açarı ola biləcəyini" göstərdiyini qeyd edib.

Xatırladaq ki, Tramp 16 oktyabrda Putinlə telefon danışığı aparmış və 2,5 saat davam edən söhbətdə Ukrayna böhranını müzakirə etmişdi.

Tramp daha sonra ABŞ və Rusiya nümayəndələrinin iştirakı ilə "Yüksək Səviyyəli Müşavirlər Görüşü" keçiriləcəyini, daha sonra Budapeştedə Putinlə görüşəcəyini açıqlamışdı.

17 oktyabrda isə Tramp Ukrayna Prezidenti Zelenskini Ağ Evdə qəbul edərək, Tomahawk raketlərinin verilməsinə hələlik razılıq vermədiyini demişdi:

"Bizim də bu raketlərə ehtiyacımız var. Son 4 ildə Ukraynaya çox şey göndərdik. İndi vəziyyət fərqlidir. Ümid edirəm ki, onlara ehtiyac olmayacaq və bu müharibə Tomahawk-lara müraciət etmədən bitəcək. Məncə, buna çox yaxınıq." Lalə Qüdrətova Son.az