Radarlar yalan danışmır. İnformasiya müharibəsində sözlər saxtalaşdırıla bilirsə, elektron sübutlar bunu bacarmır. Hərbi radar qeydləri açıq şəkildə göstərir ki, İsrailə məxsus döyüş təyyarələri Tel-Əvivdən qalxaraq, əvvəlcə Suriyanın, sonra isə İraqın hava məkanından keçərək İran ərazisinə daxil olur. Bu, adi hərbi marşrutdur və istənilən beynəlxalq müşahidəçi bu trayektoriyanı təsdiqləyə bilər. Nə Azərbaycan hava məkanında bir iz var, nə də Azərbaycan torpağında bir hərbi fəallıq.

İranın öz ərazisində qaldırılan, öz ərazisindən idarə olunan dronların guya Azərbaycandan havalanması barədə deyilənlər, məntiqlə izah ediləsi deyil. Məsələ burasındadır ki, bu hücumlar daha çox Ukraynanın Rusiya daxilindəki strateji hədəflərə qarşı həyata keçirdiyi əməliyyatlara bənzəyir. Sadə dildə desək, İran özü-öz daxilindəki boşluqlarla qarşı-qarşıyadır. Və bu boşluqlar istər-isti istəməz İsrail və ABŞ kimi xüsusi xidmət orqanlarının orada kök salmasına, təhlükəsizlik divarlarını aşmasına şərait yaradır.

Bəzən "düşmən xaricdə deyil, içəridədir" ifadəsi bəziləri üçün şüar kimi səslənsə də, bu günkü İran reallığında bu, bəlkə də tək doğru cümlədir. İranın içində sistemə qarşı mübarizə aparanlar, öz təhlükəsizlik orqanlarında belə, bu xarici təsirlərin qarşısını ala bilmirlər. Hətta bu əməliyyatların çoxu İranın strateji obyektlərinin içindən idarə olunur, kənardan yox.

Bütün bu xaos fonunda Azərbaycan-İran sərhədindəki vəziyyətə baxsaq, orada tam sabitlik və təhlükəsizlik hökm sürür. Nə hərbi həyəcan var, nə də sərhəddə qarşıdurma. Bu sabitlik, əlbəttə ki, səbəbsiz deyil. Bu, Prezident İlham Əliyevin uzaqgörən siyasətinin və zamanında atılmış diplomatik addımların nəticəsidir. Azərbaycanın İranla münasibətləri normallaşdırması, dövlət başçılarının birbaşa təması, açıq dialoq kanallarının qurulması, əslində, bu gün regionun sabitliyinə xidmət edir.

Amma nə yazıq ki, İranda hər zaman "qaranlıqdan bəslənən" zümrə olub. Onlar üçün reallıq yox, təbliğat önəmlidir. Onlar üçün təhlükəsizlik yox, günahkar tapmaq vacibdir. Azərbaycanla münasibətlərin normal olması isə onların maraqlarına uyğun deyil. Və buna görə də, məsuliyyəti öz üzərlərindən atmaq üçün Azərbaycanın adını hallandırırlar. Halbuki həqiqət Azərbaycan torpağında deyil, Tehran küçələrində gizlənib.

İranın içindəki problemləri xaricə yönəltmək cəhdi yenilik deyil, amma bu yanaşma problemi həll etmir. Azərbaycan heç vaxt başqa ölkələrin daxilində baş verən qarşıdurmalarda vasitəçi olmayıb. Azərbaycan nə baş verənlərin içindədir, nə də kənarında - sadəcə öz sərhədinə, sabitliyinə və münasibətlərə diqqət ayırır.

İslam Son.az