Son.az bildirir ki, bu fikirləri Trend-ə açıqlamasında Milli Məclisin deputatı, Azərbaycan-Almaniya Federativ Respublikası parlamentlərarası əlaqələr üzrə işçi qrupunun üzvü Azər Badamov bildirib.

Millət vəkili xatırladıb ki, Valter-Ştaynmayerin prezident qismində ölkəmizə ilk rəsmi səfəridir:

"Amma XİN rəhbəri kimi dəfələrlə ölkəmizə gəlib, ölkələrimiz arası əməkdaşlığın inkişaf etdirilməsi, keçmiş Qarabağ münaqişəsinin dinc yolla həll olunması istiqamətində fikir mübadilələri aparılıb. Dövlət başçısı İlham Əliyev Almaniya Prezidenti ilə ikitərəfli və geniştərkibli görüşlərdə mövqeyimizi və baş verən prosesləri qarşı tərəfin diqqətinə bir daha çatdırdı. Həm də dövlət başçımız ölkəmizdə keçirilən qlobal əhəmiyyətli COP29 tədbirində iştirak etməyən yeganə ölkənin Ermənistan olduğunu və iştirak etməməsinin səbəbini başa düşülən olmadığını bir daha almaniyalı həmkarının diqqətinə çatdırdı".

A.Badamovun sözlərinə görə, ölkələrimizarası iqtisadi əlaqələr yüksələn xətlə inkişaf edir və əməkdaşlığın inkişaf etdirilməsinin hüquqi bazasını yaradan 77 sənəd imzlanıb.

"Bu ilin 2 ayı ərzində keçən ilin müvafiq dövrünə nisbətən ticarət dövrüyyəsində 3 dəfədən çox artımın olması xüsusilə vurgulanıb. Almaniya ilə Azərbaycan arasında ticarət dövriyyəsinin artmasının əsasında xam neftimizin alışının artırılması dayanır. Həm də Almaniya şirkəti ilə əməkdaşlıq edərək qazımızın Avropa bazarına istehlakını həyata keçiririk. Almaniya ilə əməkdaşlığımızın dərinləşdirilməsi bərpaolunan enerjimizin Avropaya ixrac edilməsində müsbət nəticələr verəcək", - deyə deputat qeyd edib.

Milli Məclisin deputatı, Azərbaycan-Almaniya Federativ Respublikası parlamentlərarası əlaqələr üzrə işçi qrupunun üzvü Müşfiq Cəfərli isə Trend-ə açıqlamasında xatırladıb ki, uzun illərdir Almaniya Azərbaycanın Avropada ən vacib siyasi-iqtisadi tərəfdaşlarından biridir:

"Hazırda Azərbaycan ilə Almaniya arasında siyasi əlaqələr yüksək səviyyədədir, hər iki ölkənin rəhbərləri arasındakı münasibətlər də yüksək səviyyəli dialoqa əsaslanır. Prezident İlham Əliyev 2004-cü və 2007-ci illərdə Almaniyaya rəsmi və 11 dəfə isə işgüzar səfər edib. 2023-cü ilin fevral ayında dövlət başçımızın Almaniyaya növbəti səfəri baş tutub və Prezident İlham Əliyev Münxen Təhlükəsizlik Konfransında iştirak edib. Prezident Frank-Valter Ştaynmayerin Azərbaycana ötən günkü səfəri zamanı hər iki prezident Azərbaycan-Almaniya əlaqələrinin mövcud vəziyyətindən məmnunluqlarını bildirib, əməkdaşlığın perspektivlərini müzakirə ediblər".

Millət vəkilinin sözlərinə görə, Prezident Frank-Valter Ştaynmayerin Azərbaycana səfəri Azərbaycan-Almaniya etibarlı tərəfdaşlığının hərtərəfli və yüksələn xətlə inkişafının əyani göstəricisidir:

"Bu səfər bütün sahələr üzrə əməkdaşlığın daha yüksək səviyyəyə qaldırılmasına əhəmiyyətli təkan verəcək, gələcək inkişaf üçün böyük perspektivlər açacaq. Bu səfərlə bir daha Almaniyanın Azərbaycanı Cənubi Qafqazda vacib tərəfdaş kimi qəbul edib, ölkəmizin regionda lider mövqeyini, həmçinin beynəlxalq səviyyədə tanınmış sərhədləri daxilində suverenliyini və ərazi bütövlüyünü tam dəstəklədiyi sübut olundu. Həmçinin, Almaniya Azərbaycanın Avropanın enerji təhlükəsizliyinin təmin olunmasında mühüm rolunu təqdir edir".

M.Cəfərov vurğulayıb ki, Azərbaycanla Almaniya arasında əlaqələr də kifayət qədər inkişaf edib, ticarət dövriyyəsi genişlənib, qarşılıqlı ixrac artıb.

"2022-ci ildə iki ölkə arasında ümumi ticarət dövriyyəsinin həcmi 1 milyard 255 milyon ABŞ dolları olub və Almaniya Azərbaycanın xarici ticarət dövriyyəsində əsas ölkələr sırasında 8-ci yeri tutub. Son 5 ildə Azərbaycanda qeydiyyatdan keçmiş 239 alman şirkəti var və hazırda onlardan 166-nın fəaliyyəti aktivdir. Bu şirkətlər sənaye, kənd təsərrüfatı, nəqliyyat, rabitə, tikinti, bank, sığorta, ticarət və xidmət sahəsində fəaliyyət göstərirlər. Almaniya şirkətləri işğaldan azad edilmiş ərazilərdə aparılan bərpa-quruculuq işlərində iştiraka maraq göstərirlər və bununla bağlı müraciət ediblər", - deyə o fikrini yekunlaşdırıb. Son.az