Tədbirin təşkilində məqsəd böyük sənətkarın ömür yolunu, Azərbaycan musiqisinə verdiyi misilsiz töhfələri yada salmaq və tar sənətinin inkişafında oynadığı mühüm rolu bir daha ictimaiyyətə çatdırmaq olub.

Tədbirdə qeyd olunub ki, Ramiz Quliyev yalnız virtuoz tarzən deyil, Azərbaycan musiqisini Avropa, Amerika və Asiyanın bir çox ölkələrində tanıdan və təbliğ edən seçkin sənətkarlardandır. Qarabağın ağır və sınaqlı illərində sənətə gəlməsinə baxmayaraq, maestro çətinliklərə boyun əyməmiş, tar və muğam sənətinə sədaqətlə bağlı qalaraq böyük zirvələr fəth etmişdir.

O, xarici bəstəkarların əsərlərinə özünəməxsus nəfəs gətirməsi, bənzərsiz ifa tərzi və yüksək peşəkarlığı ilə dünya musiqi ictimaiyyətinin rəğbətini qazanmışdır. Tədbirdə vurğulanıb ki, böyük şair Məhəmmədhüseyn Şəhriyar maestroya 1987-ci ildə məktub yazaraq onun ifasına olan heyranlığını ifadə etmiş və iki sənətkar arasında məktublaşmalar uzun müddət davam etmişdir.

Xatirə axşamında çıxış edən ustad tarzənlər Behrad Bünyadi və Sonar Nəcəri bildiriblər ki, onların sənət yolunu seçməsində məhz Ramiz Quliyevin ifalarının böyük rolu olub. Hazırda fəaliyyət göstərən bir çox tarzən, istər maestro¬nun birbaşa tələbəsi olsun, istərsə də olmasın, onun ifa məktəbindən müəyyən şəkildə bəhrələnmişdir.

Ramiz Quliyevin Tehranda, Təbrizdə, Ərdəbildə və Zəncanda keçirdiyi konsert və master-klaslar hər zaman geniş maraq doğurub və musiqisevərlər tərəfindən böyük rəğbətlə qarşılanıb.

Xatirə gecəsində sənət və elm nümayəndələri çıxış ediblər:

• Cəlal Şəmsuzan - tədbirin məsul rəhbəri və təşkilatçısı • Həmidə Rəncbər - qiraətçi, ədəbiyyatşünas • Rza Həmrəz - tarixçi, folklorşünas, iclasın katibi • Elham Qüreyşi - qiraətçi, dublajçı • Yusif Əbdüləzimzadə - qarmon ifaçısı, folklorşünas, məruzəçi • Tar ifaçıları: Sonar Nəcəri, Behrad Bünyadi, Rza Hüseyni • Qanun ifaçısı: Paniz Sətari

Tədbirin mətninin latın qrafikalı Azərbaycan dilinə hazırlanması və digər təşkilati işlərdə Əraz Məhəmmədnejadın dəstəyi xüsusi qeyd olunub.