Rusiya hüquqmühafizə orqanları azərbaycanlılara qarşı həyata keçirilmiş əməliyyat barədə məlumat yaydı

Digərləri 28 İyn 2025 19:00:00 89 0

Rusiya hüquq-mühafizə orqanları Yekaterinburqda azərbaycanlılara qarşı həyata keçirilmiş əməliyyat barədə məlumat yayıb.

Son.az xəbər verir ki, Sverdlovsk vilayəti üzrə İstintaq Komitəsinin məlumatında bildirilir ki, Rusiyanın Sverdlovsk vilayətində bir sıra qətllərdə və adam öldürməyə cəhddə şübhəli bilinən etnik cinayətkar qrupun fəaliyyəti dayandırılıb, bir neçə nəfər saxlanılıb.

Qeyd olunub ki, saxlanılan şəxslər Rusiya Federasiyası Cinayət Məcəlləsinin 105-ci maddəsinin 2-ci hissəsi (bir qrup şəxs tərəfindən qabaqcadan əlbir olaraq törədilmiş qətl; muzdlu qətl; muzdlu adam öldürməyə cəhd) ilə ittiham olunurlar.

İstintaqın məlumatına görə, etnik cinayətkar qrupun tərkibində olan şəxslər 2001, 2010 və 2011-ci illərdə Yekaterinburq şəhərində törədilmiş bir sıra qətllər və qəsdən adam öldürməyə cəhddə iştirak ediblər.

Bildirilib ki, artıq bir neçə şübhəli şəxs əməlini etiraf edib, istintaqla əməkdaşlıq edir, həmin şəxslərin yaşayış yerlərində axtarışlar aparılıb. Saxlanılan şəxslər barəsində həbs-qətimkan tədbirinin seçilməsi məsələsinə baxılır.

Qeyd edək ki, iyunun 27-də səhər saatlarında Yekaterinburqda azərbaycanlıların yaşadığı 10-dan çox mənzildə əməliyyat keçirilib. Əslən Ağdamdan olan Səfərovlar ailəsinin əksər üzvləri tutulub. Əməliyyat zamanı iki qardaş - Ziyəddin və Hüseyn Səfərovlar öldürülüb, xeyli azərbaycanlı saxlanılıb. Bir neçə nəfər xəstəxanaya yerləşdirilib.

Hadisə ilə əlaqədar Azərbaycan Xarici İşlər Nazirliyi bəyanat yayaraq, Rusiya tərəfindən məsələyə aydınlıq gətirilməsini istəyib. Bundan başqa, iyunun 28-də Rusiyanın Azərbaycandakı səfirliyinin müvəqqəti işlər vəkili Pyotr Volokovıx Xarici İşlər Nazirliyinə çağırılıb.

Rusiya tərəfinə 27 iyun 2025-ci il tarixində həmvətənlərimizin yaşadığı mənzillərdə Rusiyanın təhlükəsizlik qüvvələri tərəfindən iki azərbaycanlının qəddarlıqla qətlə yetirildiyi, bir neçə nəfərin ağır bədən xəsarətləri aldığı, doqquz nəfərin həbs edildiyi reydləri ilə bağlı kəskin etiraz bildirilib. /APA