Tədbirdə çıxış edən Mərkəzin direktoru, Əməkdar artist, Özbəkistanın Mədəniyyət səfiri Sahib Paşazadə Ramiz Quliyevin Azərbaycan musiqi sənətində müstəsna xidmətlərindən danışıb. O, bildirib: "Ramiz Quliyev Azərbaycan tar ifaçılığı məktəbinin parlaq simalarından biridir. Onun çoxşaxəli yaradıcılığı təkcə ifaçılıqla məhdudlaşmayıb, həm də pedaqoji və elmi fəaliyyəti ilə zəngin olub. Sənətkarın irsi gələcəkdə də geniş araşdırılacaq, ona həsr olunan elmi işlər, dissertasiyalar və məqalələr davam etdiriləcək. Çünki belə sənətkarların yaradıcılığı tükənməz xəzinədir". Tədbirdə çıxış edən Xalq artisti, professor Siyavuş Kərimi, Vamiq Məmmədəliyev, Üzeyir Hacıbəyli adına Bakı Musiqi Akademiyasının Elmi-Tədqiqat Laboratoriyasının müdiri, sənətşünaslıq üzrə fəlsəfə doktoru, dosent Nuridə İsmayılzadə Ramiz Quliyevin zəngin yaradıcılıq yolundan, Azərbaycan tar ifaçılığı məktəbinin formalaşması və təkmilləşməsində göstərdiyi xidmətlərdən bəhs ediblər. Qeyd olunub ki, sənətkarın çoxillik pedaqoji fəaliyyəti nəticəsində yeni ifaçılar nəsli yetişib. Onun səhnə mədəniyyəti, repertuar seçimi və interpretasiya üslubu bu gün də gənc musiqiçilər üçün nümunədir. Çıxışçılar tədbiri sənətkarın zəngin sənət yoluna ehtiramın ifadəsi olmaqla yanaşı, milli musiqi irsinin yaşadılması və gələcək nəsillərə ötürülməsi baxımından da əlamətdar hadisə kimi qiymətləndiriliblər. Gecədə Əməkdar artistlər Ramil Qasımov, Vüsal İsgəndərzadə, Qoçaq Əsgərov, Bəyimxanım Vəliyeva, mərkəzin solistləri Elgiz Əliyev, Səbinə Ərəbli, Nisbət Sədrayeva, Günay İmamverdiyeva, Rövşən Qurbanov, Kamal Nuriyev, Rəşad İbrahimov çıxış ediblər. Ramiz Quliyevin oğlu, Əməkdar artist, Azərbaycan Dövlət Akademik Opera və Balet Teatrının baş dirijoru, Qara Qarayev adına Dövlət Kamera Orkestrinin dirijoru Əyyub Quliyev atasının xatirəsinə göstərilən diqqətə görə minnətdarlığını bildirib.  Gecəni Mərkəzin solisti, tarzən Rövşən Qurbanovun rəhbərliyi ilə instrumental heyət müşayiət edib. Ansamblın tərkibində kamançada Ceyhun Muradov, qanunda Əməkdar artist Təranə Əliyeva, balabanda Rafael Əsgərov, nağarada isə Amil Mustafayev çıxış ediblər. Konsert proqramında sənətkarın repertuarından nümunələr və Azərbaycan bəstəkarlarının əsərləri səsləndirilib. İnformasiya dəstəyi - Trend.Az, Day.Az, Son.az